სოსო პაიჭაძე დაიბადა 1943 წლის 21 აგვისტოს ქალაქ ბათუმში. 1960 წელს დაამთავრა ბათუმის პირველი საშუალო სკოლა და სწავლა განაგრძო პედაგოგიური ინსტიტუტის ისტორია-ფილოლოგიის ფაკულტეტზე, შემდგომ თბილისის სახელმწიფო უნივერსიტეტის ფილოლოგიის ფაკულტეტზე, რომელიც 1965 წელს დაასრულა. სხვადასხვა დროს მუშაობდა კინოსტუდია „ქართულ ფილმში“ რეჟისორის ასისტენტად, მრავალი წლის მანძილზე ჟურნალ „მნათობის“ მთავარი რედაქტორის მოადგილე იყო. ლიტერატურული მოღვაწეობა 1969 წელს დაიწყო, როცა გაზეთ „ლიტერატურულ საქართველოში“ გამოქვეყნდა მწერლის პირველი ლიტერატურულ-კრიტიკული სტატია. პირველი მოთხრობები კი 1970 წელს გამოჩნდა. 1977 წელს გამომცემლობა „მერანმა“ მისი მოთხრობების პირველი კრებული „უკანასკნელი დუბლი“ გამოსცა. 1985 წელს გამოვიდა მწერლის მეორე კრებული. 1990 წელს ჟურნალ „მნათობში“ გამოქვეყნებული მოთხრობისათვის „თბილი გრძნეული წვიმა“ მწერალთა კავშირის პრემია მიენიჭა. 1995 წელს დაიბეჭდა მწერლის ბოლო წიგნი „სადაით დაეცი“. მისი მოთხრობები თარგმნილია რუსულ, უკრაინულ, უნგრულ, ჩეხურ, გერმანულ, იუგოსლავიურ ენებზე. მწერლის მოთხრობა „ბაქანი – ბოტანიკური ბაღი“ შესულია ქარჩხაძის გამომცემლობის გამოცემულ წიგნში – მე-20 საუკუნის ქართული მოთხრობის ანთოლოგია.

ვლადიმერ სიხარულიძე დაიბადა 1940 წლის 22 იანვარს ქალაქ თბილისში. საშუალო განათლება 1-ელ კლასიკურ გიმნაზიაში მიიღო, შემდგომ სწავლა განაგრძო სახელმწიფო უნივერსიტეტში ისტორიის ფაკულტეტზე. 1967 წელს გამოქვეყნდა მწერლის პირველი მოთხრობა „მეათე მოწმე“, რომელიც მალევე ითარგმნა ათამდე უცხო ენაზე. მას მოჰყვა მოთხრობები „მაცგი“, „უხამსი“. ნაწარმოებების გამოქვეყნების შემდეგ მიიღო მოწვევა მოსკოვში ორწლიან სასცენარო კურსებზე. ვლადიმერ სიხარულიძე ავტორია პიესებისა: „გარეუბნის მარტო სახლი“, „ოიდიპოსი“, „ცხელი აგვისტო“, „ღამის შემთხვევა“. მწერლის პიესების მიხედვით გადაღებულია ფილმები „მაცგი“ და „ბავშვობა“. მწერლის მოთხრობა „მტარვალი“ შესულია ქარჩხაძის გამომცემლობის გამოცემულ წიგნში – მე-20 საუკუნის ქართული მოთხრობის ანთოლოგია.

ჯემალ თოფურიძე დაიბადა 1947 წელს ქალაქ თბილისში. სწავლობდა თბილისის 51-ე და ბათუმის პირველ საშუალო სკოლებში. დაამთავრა ივანე ჯავახიშვილის სახელობის თბილისის სახელმწიფო უნივერსიტეტის გეოგრაფია-გეოლოგიის ფაკულტეტი. სხვადასხვა დროს მუშაობდა საქართველოს მეცნიერებათა აკადემიის ეკონომიკისა და მართვის ინსტიტუტში,ქართული ლიტერატურის,ინსტიტუტში. 1974 წლიდან იბეჭდება მისი მოთხრობები ლიტერატურულ ჟურნალ „ცისკარში“, ლიტერატურულ საქართველოში“ და სხვა. ჯემალ თოფურიძეს მიენიჭა მწერალთა კავშირის პრემია წლის საუკეთესო მოთხრობისათვის. მისი ნამუშევრები თარგმნილია სხვადასხვა ენებზე.

ჯემალ თოფურიძე გარდაიცვალა 1978 წელს.

მწერალი მერაბ აბაშიძე დაიბადა 1950 წლის 1 ივლისს ქალაქ თბილისში. საშუალო განათლება მიიღო 29-ე სკოლაში და სწავლა განაგრძო სამედიცინო ინსტიტუტში, რომელიც 1975 წელს დაამთავრა. მერაბ აბაშიძე წერდა ლექსებს, მოთხრობების წერა 19 წლის ასაკში დაიწყო. პირველი მოთხრობაა „აქეთ მაშხლები, კვაზიმოდო!“, მას მოჰყვა „პოეზიის ხანძრის ქალიშვილი“, „წყალში გადაყრილი მიხაკები“. მწერლის მოთხრობები პირველად ჟურნალ „ცისკარში“ დაიბეჭდა და დიდი რეზონანსიც გამოიწვია, შემდგომ ჟურნალ „მნათობში“, „მერანში“. სხვადასხვა დროს გამოცემულია მწერლის ნაწარმოებები – „აქეთ მაშხლები, კვაზიმოდო!“, „ცეროდენა ანგელოზი“, „ჯვარი“. მოთხრობები თარგმნილია რუსულ ენაზე. მწერლის შემოქმედების მიხედვით გადაღებულია სამი ფილმი – „აქეთ მაშხლები, კვაზიმოდო!“, „სერაფიტა“, „მეთევზე“; დადგმულია სპექტაკლები და რადიო-სპექტაკლები.

1904-1930 წწ.